Даңқты батыр М.Сеңгірбаев атындағы орта мектепте Қазақстан Республикасы Ұлттық музейі директорының орынбасары, «Қаңтар қырғыны» оқиғасының Батыры, «Парасат» орденінің иегері Бибігүл Дандығараевамен кездесу өтті. Аталған жиынға Балқаш ауданының ішкі саясат, мәдениет, тілдерді дамыту және спорт бөлімінің басшысы Аманжолова Гауһар Аманжолқызы, М.Сеңгірбаев атындағы орта мектептің мұғалімдері мен жоғары сынып оқушылары қатысты.
Жиында Б.Дандығараева кешегі «Қаңтар қырғыны» оқиғасындағы әрекеттер, жастардың түрлі ағымдарға еріп кетуі салдарынан еліміздің шеккен зардаптары т.б. жайлы әңгімеледі. Қазақстан Республикасы Президенті Қасым-Жомарт Тоқаевтың өте тиімді саясат қолданып, нақты шешім қабылдағаны туралы, бүгінгі жаңа Қазақстанды құрудағы алдағы нақты міндеттер жайында тоқталды.
Оқушылар тарапынан Қазақстан Республикасы Ұлттық музейін қорғаудағы ерліктері, қазіргі кезде музейдің қалпына келтірілу деңгейі жайлы сұрақтар қойылып, тұщымды жауаптар алынды.
Жиын соңында Балқаш аудандық білім беруді дамыту оқу-әдістемелік орталығының аға әдіскері Ж.Қойшығұлов арнайы туған жерге ат басын бұрып келген «Парасат» орденінің иегері Бибігүл Дандығараеваға тағылымға толы кездесу үшін аудандық білім бөлімі тарапынан алғыс айтты.